dayar-e-hijr mein KHud ko to aksar bhul jata hun

dayār-e-hijr meñ ḳhud ko to aksar bhuul jaatā huuñ

tujhe bhī maiñ tirī yādoñ meñ kho kar bhuul jaatā huuñ

'ajab din the ki barsoñ zarb-e-ḳhushbū yaad rahtī thī

'ajab din haiñ ki fauran zaḳhm-e-ḳhanjar bhuul jaatā huuñ

guzar jaatā huuñ ghar ke sāmne se be-ḳhayālī meñ

kabhī daftar ke darvāze pe daftar bhuul jaatā huuñ

isī baa.is baḌī chāhat se miltā huuñ ki maiñ aksar

judā hote hī chehra naam paikar bhuul jaatā huuñ

mujhe patthar kī sūrat hī sahī zinda to rahnā hai

so maiñ har vāqi.a manzar-ba-manzar bhuul jaatā huuñ

vo sab kuchh yaad rakhtā huuñ bhulānā jis kā behtar ho

magar jo yaad rakhnā ho sarāsar bhuul jaatā huuñ

dayar-e-hijr mein KHud ko to aksar bhul jata hun

tujhe bhi main teri yaadon mein kho kar bhul jata hun

'ajab din the ki barson zarb-e-KHushbu yaad rahti thi

'ajab din hain ki fauran zaKHm-e-KHanjar bhul jata hun

guzar jata hun ghar ke samne se be-KHayali mein

kabhi daftar ke darwaze pe daftar bhul jata hun

isi bais baDi chahat se milta hun ki main aksar

juda hote hi chehra nam paikar bhul jata hun

mujhe patthar ki surat hi sahi zinda to rahna hai

so main har waqia manzar-ba-manzar bhul jata hun

wo sab kuchh yaad rakhta hun bhulana jis ka behtar ho

magar jo yaad rakhna ho sarasar bhul jata hun