dekh kar rū-e-sanam ko na bahal jā.ūñgā
marte dam le ke sambhālā to sambhal jā.ūñgā
tan kafan-posh to ho aur hī pairāhan meñ
ujle kapḌe meñ badalte hī badal jā.ūñgā
chaman-e-dahr meñ vo barg-e-ḳhizānī huuñ maiñ
gar na barbād huā aag meñ jal jā.ūñgā
huuñ vo sābit-qadam ai charḳh jo bhauñchāl bhī aa.e
chāhe Tal jaa.e zamīñ maiñ nahīñ Tal jā.ūñgā
maiñ vo uftāda-e-chashm-o-nazar-e-ālam huuñ
paañv pakḌegī zamīñ bhī to phisal jā.ūñgā
sāz-o-sāmān-e-tarab kuchh na agar haath aayā
jhāñjh ho kar kaf-e-afsos hī mal jā.ūñgā
'shād' bahkūñ na kabhī nashsha-e-daulat ho hazār
kuchh maiñ kam-zarf nahīñ huuñ jo ubal jā.ūñgā
dekh kar ru-e-sanam ko na bahal jaunga
marte dam le ke sambhaala to sambhal jaunga
tan kafan-posh to ho aur hi pairahan mein
ujle kapDe mein badalte hi badal jaunga
chaman-e-dahr mein wo barg-e-KHizani hun main
gar na barbaad hua aag mein jal jaunga
hun wo sabit-qadam ai charKH jo bhaunchaal bhi aae
chahe Tal jae zamin main nahin Tal jaunga
main wo uftada-e-chashm-o-nazar-e-alam hun
panw pakDegi zamin bhi to phisal jaunga
saz-o-saman-e-tarab kuchh na agar hath aaya
jhanjh ho kar kaf-e-afsos hi mal jaunga
'shad' bahkun na kabhi nashsha-e-daulat ho hazar
kuchh main kam-zarf nahin hun jo ubal jaunga
Source:
Sukhan-e-Bemisal: Deewan-e-Shad (pdf) and website (Pg. p-12 e-18 pdf-18)
-
Author:
Shad Lakhnavi
-
- Edition: 1901
- Publisher: Matbaa Tasweer-e- Alam, Lucknow
- Year of Publication: 1901
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.