dekhne se tere ji pata hun

dekhne se tire jī paatā huuñ

aañkh ke pherte mar jaatā huuñ

tere hoñToñ ke ta.iiñ paan se laal

dekh kar ḳhūn-e-jigar khātā huuñ

aarzū meñ tirī yak muddat se

apne dil ke ta.iiñ tarsātā huuñ

chaav jo dil meñ bhare haiñ pyāre

tujh se kahtā huā sharmātā huuñ

bhūle-bisre jo kabhī vahshī sā

tere kūche kī taraf aatā huuñ

dekh darvāze kī sūrat tere

naqsh-e-dīvār sā ho jaatā huuñ

tū jo nikle hai badaltā āñkheñ

us ghaḌī apnā kiyā paatā huuñ

dil-e-ġham-ghīñ ke ta.iiñ murdā sā

god meñ apne uThā laatā huuñ

aañsū pūchhūñ huuñ dilāsā de de

mannateñ kar ke maiñ samjhātā huuñ

vo nahīñ māntā juuñ juuñ 'hātim'

tuuñ tuuñ jiine se maiñ ghabrātā huuñ

dekhne se tere ji pata hun

aankh ke pherte mar jata hun

tere honTon ke tain pan se lal

dekh kar KHun-e-jigar khata hun

aarzu mein teri yak muddat se

apne dil ke tain tarsata hun

chaw jo dil mein bhare hain pyare

tujh se kahta hua sharmata hun

bhule-bisre jo kabhi wahshi sa

tere kuche ki taraf aata hun

dekh darwaze ki surat tere

naqsh-e-diwar sa ho jata hun

tu jo nikle hai badalta aankhen

us ghaDi apna kiya pata hun

dil-e-gham-ghin ke tain murda sa

god mein apne uTha lata hun

aansu puchhun hun dilasa de de

mannaten kar ke main samjhata hun

wo nahin manta jun jun 'hatim'

tun tun jine se main ghabraata hun