dekhta hai wo khiDkiyon se mujhe

dekhtā hai vo khiḌkiyoñ se mujhe

paar kartā hai kashtiyoñ se mujhe

rail se pahle kaTte dekhegā

phir sameTegā paTriyoñ se mujhe

ret ko bhī pata nahīñ chaltā

kaun likhtā hai uñgliyoñ se mujhe

bhīge kāġhaz pe kuchh lakīreñ thiiñ

yaad aaya hatheliyoñ se mujhe

phir maiñ DhūñDūñ use zamāne tak

phir pukāre vo dūriyoñ se mujhe

aur kuchh din agar khilā rahtā

pyaar ho jaatā titliyoñ se mujhe

Thiik se baat kar nahīñ paatā

sharm aatī hai laḌkiyoñ se mujhe

jab koī yaad karne vaalā nahīñ

kyā ilāqa ho hichkiyoñ se mujhe

merī jānib bhī koī haath baḌhe

khīñch le koī khā.iyoñ se mujhe

dekhta hai wo khiDkiyon se mujhe

par karta hai kashtiyon se mujhe

rail se pahle kaTte dekhega

phir sameTega paTriyon se mujhe

ret ko bhi pata nahin chalta

kaun likhta hai ungliyon se mujhe

bhige kaghaz pe kuchh lakiren thin

yaad aaya hatheliyon se mujhe

phir main DhunDun use zamane tak

phir pukare wo duriyon se mujhe

aur kuchh din agar khila rahta

pyar ho jata titliyon se mujhe

Thik se baat kar nahin pata

sharm aati hai laDkiyon se mujhe

jab koi yaad karne wala nahin

kya ilaqa ho hichkiyon se mujhe

meri jaanib bhi koi hath baDhe

khinch le koi khaiyon se mujhe