dhaDkanen dil ki gine KHun mein rawani mange

dhaḌkaneñ dil kī gine ḳhuuñ meñ ravānī māñge

zindagī ishq kī ai dost javānī māñge

pesh kar daaġh agar dil pe koī khāyā ho

ishq har āshiq-e-sādiq se nishānī māñge

zulf-e-shab-gūñ tire shāne pe khulī nāgin hai

Das le ye jis ko na phir uTh ke vo paanī māñge

aadmī ahd-e-javānī meñ rahā munkir-e-ġham

ab ġham-e-dil kī ḳhabar hai to javānī māñge

husn har gaam pe qaa.em kare ik taaza hijāb

ishq parde kī ye dīvār girānī māñge

din ko sotī hai mohabbat kī kashish āñkhoñ meñ

raat ko chāñd sitāroñ kī kahānī māñge

mai-kade meñ mire saaqī kā nayā hukm ye hai

shaam ko pyaas lage sub.h ko paanī māñge

dilbarī pesha hai ye chor bhī apne dil kā

aañkh har ek haqīqat se churānī māñge

kyā na.e dost-navāzo kā bharosā hai 'nushūr'

dostī ye hai ki vo rasm purānī māñge

dhaDkanen dil ki gine KHun mein rawani mange

zindagi ishq ki ai dost jawani mange

pesh kar dagh agar dil pe koi khaya ho

ishq har aashiq-e-sadiq se nishani mange

zulf-e-shab-gun tere shane pe khuli nagin hai

Das le ye jis ko na phir uTh ke wo pani mange

aadmi ahd-e-jawani mein raha munkir-e-gham

ab gham-e-dil ki KHabar hai to jawani mange

husn har gam pe qaem kare ek taza hijab

ishq parde ki ye diwar girani mange

din ko soti hai mohabbat ki kashish aankhon mein

raat ko chand sitaron ki kahani mange

mai-kade mein mere saqi ka naya hukm ye hai

sham ko pyas lage subh ko pani mange

dilbari pesha hai ye chor bhi apne dil ka

aankh har ek haqiqat se churani mange

kya nae dost-nawazo ka bharosa hai 'nushur'

dosti ye hai ki wo rasm purani mange