dhaDkanon ki sab kahani KHatm-shud

dhaḌkanoñ kī sab kahānī ḳhatm-shud

merī āñkhoñ kā bhī paanī ḳhatm-shud

mai na.ī laao dukān-e-hijr se

jo paḌī thī kuchh purānī ḳhatm-shud

ye rahī vo jhiil jis kī khoj thī

panchhiyo naql-e-makānī ḳhatm-shud

barf ne sar par baserā kar liyā

ab javānī kī kahānī ḳhatm-shud

shahr-e-dil kī raunaqeñ sab kho ga.iiñ

har tarah kī shādmānī ḳhatm-shud

uñgliyoñ ke bolne se ye huā

sab payām-e-muñh-zabānī ḳhatm-shud

chal ke 'āsif' pūchhte haiñ vaqt se

kab ye hogī rā.egānī ḳhatm-shud

dhaDkanon ki sab kahani KHatm-shud

meri aankhon ka bhi pani KHatm-shud

mai nai lao dukan-e-hijr se

jo paDi thi kuchh purani KHatm-shud

ye rahi wo jhil jis ki khoj thi

panchhiyo naql-e-makani KHatm-shud

barf ne sar par basera kar liya

ab jawani ki kahani KHatm-shud

shahr-e-dil ki raunaqen sab kho gain

har tarah ki shadmani KHatm-shud

ungliyon ke bolne se ye hua

sab payam-e-munh-zabani KHatm-shud

chal ke 'asif' puchhte hain waqt se

kab ye hogi raegani KHatm-shud