dho ke ashkon se kai bar ujali hui hai

dho ke ashkoñ se ka.ī baar ujālī huī hai

dhuup meñ jal ke vo tasvīr bhī kaalī huī hai

maiñ girūñgā to isī ḳhaak se uTThegā koī

haq-parastoñ se ye duniyā kabhī ḳhālī huī hai

lucknow naaz hai jis par vahī kohna tahzīb

ham ne virse meñ salīqe se sambhālī huī hai

ab na tasvīr hai koī na hai kīloñ kī chubhan

dil kī dīvār isī saal se ḳhālī huī hai

ḳhaak meñ mil gayā jab ruuh kā ḳhālī piñjra

mansab-e-ishq pe tab apnī bahālī huī hai

dasht-e-vahshat kā koī ḳhauf nahīñ hai ham ko

sab bhulā dene kī tadbīr nikālī huī hai

tere jaisā to kahīñ koī nahīñ hai jānāñ

ham ne āfāq kī manzil bhī khañgālī huī hai

haañ mirī fikr alag hai to sabab hai is kā

dard ke chūlhe pe sau baar ubālī huī hai

apnā haq māñgnā hākim se baġhāvat hai magar

ye rivāyat bhī hamārī hī to Daalī huī hai

mere un sheroñ pe sar dhuntī rahegī duniyā

jin meñ timsāl-garī dekhne vaalī huī hai

dho ke ashkon se kai bar ujali hui hai

dhup mein jal ke wo taswir bhi kali hui hai

main girunga to isi KHak se uTThega koi

haq-paraston se ye duniya kabhi KHali hui hai

lucknow naz hai jis par wahi kohna tahzib

hum ne wirse mein saliqe se sambhaali hui hai

ab na taswir hai koi na hai kilon ki chubhan

dil ki diwar isi sal se KHali hui hai

KHak mein mil gaya jab ruh ka KHali pinjra

mansab-e-ishq pe tab apni bahaali hui hai

dasht-e-wahshat ka koi KHauf nahin hai hum ko

sab bhula dene ki tadbir nikali hui hai

tere jaisa to kahin koi nahin hai jaanan

hum ne aafaq ki manzil bhi khangali hui hai

han meri fikr alag hai to sabab hai is ka

dard ke chulhe pe sau bar ubaali hui hai

apna haq mangna hakim se baghawat hai magar

ye riwayat bhi hamari hi to Dali hui hai

mere un sheron pe sar dhunti rahegi duniya

jin mein timsal-gari dekhne wali hui hai