dhundlahaTon mein gum the jo manzar chamak gae

dhuñdlāhaToñ meñ gum the jo manzar chamak ga.e

merī nazar se kitne hī parde sarak ga.e

is sāya-e-badan meñ Thahar jaa.eñ ab to ham

be-nām manziloñ ke tajassus meñ thak ga.e

ye kis ke ġham kī aañch se pighlā hai sang-e-dil

āñkhoñ se merī aaj phir aañsū Tapak ga.e

ḳhud ko talāsh kar ki haiñ tujh meñ haqīqateñ

un kī taraf na dekh jo sū-e-falak ga.e

kāñToñ kī fasl hai mirī rāhoñ kā pairahan

vo rāste kidhar haiñ jo phūloñ se Dhak ga.e

ujḌe badan sañvar na sake yuuñ to dosto

bāġhoñ meñ rut javān huī phal bhī pak ga.e

dhundlahaTon mein gum the jo manzar chamak gae

meri nazar se kitne hi parde sarak gae

is saya-e-badan mein Thahar jaen ab to hum

be-nam manzilon ke tajassus mein thak gae

ye kis ke gham ki aanch se pighla hai sang-e-dil

aankhon se meri aaj phir aansu Tapak gae

KHud ko talash kar ki hain tujh mein haqiqaten

un ki taraf na dekh jo su-e-falak gae

kanTon ki fasl hai meri rahon ka pairahan

wo raste kidhar hain jo phulon se Dhak gae

ujDe badan sanwar na sake yun to dosto

baghon mein rut jawan hui phal bhi pak gae