DhunDte ho jise dafinon mein

DhūñDte ho jise dafīnoñ meñ

vahī vahshī hai sab ke sīnoñ meñ

mere qābīl kī rivāyat haiñ

purze jitne bhī haiñ mashīnoñ meñ

sub.h-dam phir se baañT dī kis ne

tīrgī shahr ke makīnoñ meñ

bhuuk boī ga.ī hai ab ke baras

daañt ug aa.e haiñ zamīnoñ meñ

zindagī gaañv kī hasīñ laḌkī

ghir ga.ī hai tamāsh-bīnoñ meñ

kis musāfir kī baat karte ho

ab to tūfān haiñ safīnoñ meñ

kis mashaqqat ke saañs letā huuñ

ye ġhazal bhī huī mahīnoñ meñ

DhunDte ho jise dafinon mein

wahi wahshi hai sab ke sinon mein

mere qabil ki riwayat hain

purze jitne bhi hain mashinon mein

subh-dam phir se banT di kis ne

tirgi shahr ke makinon mein

bhuk boi gai hai ab ke baras

dant ug aae hain zaminon mein

zindagi ganw ki hasin laDki

ghir gai hai tamash-binon mein

kis musafir ki baat karte ho

ab to tufan hain safinon mein

kis mashaqqat ke sans leta hun

ye ghazal bhi hui mahinon mein