dikhla na Khaal-e-naf tu ai gul-badan mujhe

dikhlā na ḳhāl-e-nāf tū ai gul-badan mujhe

har laala yaañ hai nāfa-e-mushk-e-ḳhutan mujhe

hamdam vabāl-e-dosh na kar pairahan mujhe

kāñTā sā hai khaTaktā mirā tan badan mujhe

phirtā liye chaman meñ hai dīvāna-pan mujhe

zanjīr-e-pā hai mauj-e-nasīm-e-chaman mujhe

tasbīh-e-daur-e-bazm meñ dekho imaam ko

baḳhshī hai haq ne zeb-e-sar-e-anjuman mujhe

ai mere yāsman tire dandān-e-ābdār

gulshan meñ haiñ rulāte gul-e-yāsman mujhe

mehrāb-e-kāba jab se hai terā ḳham-e-kamāñ

said-e-haram samajhte haiñ nāvak-fagan mujhe

hai tan meñ rīsha-hā-e-na.e ḳhushk ustuḳhvāñ

kyuuñ khīñchtā hai kāñToñ meñ ai zof-e-tan mujhe

ai lab misī ko pheñk ki nīlam hai kam-bahā

yāqūt de yā de koī lāl-e-yaman mujhe

huuñ sham.a yā ki shola ḳhabar kuchh nahīñ magar

fānūs ho rahā hai mirā pairahan mujhe

ik sarzamīn-e-lāla bahār o ḳhizāñ meñ huuñ

yaksāñ hai dāġh-e-tāza o dāġh-e-kuhan mujhe

ḳhusrav se tesha bolā jo chāTūñ na terā ḳhuuñ

shīrīñ na hove ḳhūn-e-sar-e-koh-kan mujhe

ruḳh par tumhāre daam jo Daalā hai sabze ne

aatā nazar hai dīda-e-anqā-dahan mujhe

ye dil vo hai ki kar de zamīñ āsmāñ ko ḳhaak

ik dam ko barq de jo pinhā pairahan mujhe

kūche meñ tere kaun thā letā bhalā ḳhabar

shab chāndnī ne aa ke pahnāyā kafan mujhe

dikhlātā āsmāñ se hai rū-e-zamīñ kī sair

ai rashk-e-māh terī jabīñ kā shikan mujhe

rakhtā hai chashm-e-lutf pe kis kis adā ke saath

detā hai jaam sāqi-e-paimāñ-shikan mujhe

hai jazb-e-dil durust to chāh-e-firāq se

khīñchegī terī zulf shikan-dar-shikan mujhe

dikhlātā ik adā meñ hai sau sau tarah banāo

is sāda-pan ke saath tirā bāñkpan mujhe

jaise kueñ meñ ho koī taarā chamak rahā

dil sūjhtā hai yuuñ tah-e-chāh-e-zaqan mujhe

aa kar use bhī do kabhī āñkheñ zarā dikhā

āñkheñ dikhā rahā hai ġhazāl-e-ḳhutan mujhe

aa ai mire chaman ki huā meñ tirī havā

sahrā-e-dil huā hai chaman-dar-chaman mujhe

yā rab ye dil hai yā ki hai ā.īna-e-nazar

dikhlā rahā hai sair o safar dar vatan mujhe

aayā huuñ nuur le ke maiñ bazm-e-suḳhan meñ 'zauq'

āñkhoñ pe sab biThā.eñge ahl-e-suḳhan mujhe

dikhla na KHal-e-naf tu ai gul-badan mujhe

har lala yan hai nafa-e-mushk-e-KHutan mujhe

hamdam wabaal-e-dosh na kar pairahan mujhe

kanTa sa hai khaTakta mera tan badan mujhe

phirta liye chaman mein hai diwana-pan mujhe

zanjir-e-pa hai mauj-e-nasim-e-chaman mujhe

tasbih-e-daur-e-bazm mein dekho imam ko

baKHshi hai haq ne zeb-e-sar-e-anjuman mujhe

ai mere yasman tere dandan-e-abdar

gulshan mein hain rulate gul-e-yasman mujhe

mehrab-e-kaba jab se hai tera KHam-e-kaman

said-e-haram samajhte hain nawak-fagan mujhe

hai tan mein risha-ha-e-nae KHushk ustuKHwan

kyun khinchta hai kanTon mein ai zof-e-tan mujhe

ai lab misi ko phenk ki nilam hai kam-baha

yaqut de ya de koi lal-e-yaman mujhe

hun shama ya ki shola KHabar kuchh nahin magar

fanus ho raha hai mera pairahan mujhe

ek sarzamin-e-lala bahaar o KHizan mein hun

yaksan hai dagh-e-taza o dagh-e-kuhan mujhe

KHusraw se tesha bola jo chaTun na tera KHun

shirin na howe KHun-e-sar-e-koh-kan mujhe

ruKH par tumhaare dam jo Dala hai sabze ne

aata nazar hai dida-e-anqa-dahan mujhe

ye dil wo hai ki kar de zamin aasman ko KHak

ek dam ko barq de jo pinha pairahan mujhe

kuche mein tere kaun tha leta bhala KHabar

shab chandni ne aa ke pahnaya kafan mujhe

dikhlata aasman se hai ru-e-zamin ki sair

ai rashk-e-mah teri jabin ka shikan mujhe

rakhta hai chashm-e-lutf pe kis kis ada ke sath

deta hai jam saqi-e-paiman-shikan mujhe

hai jazb-e-dil durust to chah-e-firaq se

khinchegi teri zulf shikan-dar-shikan mujhe

dikhlata ek ada mein hai sau sau tarah banao

is sada-pan ke sath tera bankpan mujhe

jaise kuen mein ho koi tara chamak raha

dil sujhta hai yun tah-e-chah-e-zaqan mujhe

aa kar use bhi do kabhi aankhen zara dikha

aankhen dikha raha hai ghazal-e-KHutan mujhe

aa ai mere chaman ki hua mein teri hawa

sahra-e-dil hua hai chaman-dar-chaman mujhe

ya rab ye dil hai ya ki hai aaina-e-nazar

dikhla raha hai sair o safar dar watan mujhe

aaya hun nur le ke main bazm-e-suKHan mein 'zauq'

aankhon pe sab biThaenge ahl-e-suKHan mujhe