dil-e-baadshah ki KHair ho

dil-e-bādshāh kī ḳhair ho

tire ḳhair-ḳhvāh kī ḳhair ho

vo ġhazal nahīñ mirī aah thī

tirī vaah vaah kī ḳhair ho

tirā 'ishq hai mirā jurm agar

mire is gunāh kī ḳhair ho

na.e dard se huā āshnā

ġham-e-rasm-o-rāh kī ḳhair ho

tirī chashm terī jabīn ke

sabhī mehr-o-māh kī ḳhair ho

dil-e-nā-rasā kī hai aarzū

mire kaj-kulāh kī ḳhair ho

mire ashk haiñ mire tarjumāñ

tirī qāh-qāh kī ḳhair ho

mire 'ijz kī hai du'ā 'amar'

tire 'izz-o-jāh kī ḳhair ho

dil-e-baadshah ki KHair ho

tere KHair-KHwah ki KHair ho

wo ghazal nahin meri aah thi

teri wah wah ki KHair ho

tera 'ishq hai mera jurm agar

mere is gunah ki KHair ho

nae dard se hua aashna

gham-e-rasm-o-rah ki KHair ho

teri chashm teri jabin ke

sabhi mehr-o-mah ki KHair ho

dil-e-na-rasa ki hai aarzu

mere kaj-kulah ki KHair ho

mere ashk hain mere tarjuman

teri qah-qah ki KHair ho

mere 'ijz ki hai du'a 'amar'

tere 'izz-o-jah ki KHair ho