dil-e-be-qarar chala to tha gila-e-hayat liye hue

dil-e-be-qarār chalā to thā gila-e-hayāt liye hue

ġham-e-ishq ruuh pe chhā gayā ġham-e-kā.enāt liye hue

kabhī be-irāda chhalak ga.ī thī kisī ke zikr pe chashm-e-nam

vo haiñ mujh se aaj bhī bad-gumāñ vahī ek baat liye hue

mire dil ke saath hī chhīn le mirī ḳhud-shanās nigāh bhī

maiñ tire qarīb na ā.ūñgā ye tavahhumāt liye hue

kabhī tujh pe apnā gumān hai kabhī ḳhud pe terā gumān hai

mire kirdgār kahāñ rahūñ ye tasavvurāt liye hue

shab-e-intizār ke ba.ad phir na huī tulū koī sahar

mirī umr saarī guzar ga.ī yahī ek raat liye hue

tujhe nāz-e-zabt bajā sahī magar ai 'farīdī'-e-sāda-dil

koī chashm-e-sho.ala-mizāj hai tire dil kī baat liye hue

dil-e-be-qarar chala to tha gila-e-hayat liye hue

gham-e-ishq ruh pe chha gaya gham-e-kaenat liye hue

kabhi be-irada chhalak gai thi kisi ke zikr pe chashm-e-nam

wo hain mujh se aaj bhi bad-guman wahi ek baat liye hue

mere dil ke sath hi chhin le meri KHud-shanas nigah bhi

main tere qarib na aaunga ye tawahhumat liye hue

kabhi tujh pe apna guman hai kabhi KHud pe tera guman hai

mere kirdgar kahan rahun ye tasawwuraat liye hue

shab-e-intizar ke baad phir na hui tulu koi sahar

meri umr sari guzar gai yahi ek raat liye hue

tujhe naz-e-zabt baja sahi magar ai 'faridi'-e-sada-dil

koi chashm-e-shoala-mizaj hai tere dil ki baat liye hue