dil-jalon se dil-lagi achchhi nahin

dil-jaloñ se dil-lagī achchhī nahīñ

rone vāloñ se hañsī achchhī nahīñ

muñh banātā hai burā kyuuñ vaqt-e-va.az

aaj vā'iz tū ne pī achchhī nahīñ

zulf-e-yār itnā na rakh dil se lagāo

dostī nādān kī achchhī nahīñ

but-kade se mai-kada achchhā mirā

be-ḳhudī achchhī ḳhudī achchhī nahīñ

muflisoñ kī zindagī kā zikr kyā

muflisī kī maut bhī achchhī nahīñ

is qadar khiñchtī hai kyuuñ ai zulf-e-yār

le ke dil itnī kajī achchhī nahīñ

aa.eñ merī bazm-e-mātam meñ vo kyā

haath meñ meñhdī rachī achchhī nahīñ

shaiḳh ko de do mai-e-be-rañg-o-bū

us kī qismat se khiñchī achchhī nahīñ

ik hasīñ ho dil ke bahlāne ko roz

roz kī ye dil-lagī achchhī nahīñ

zarra zarra āftāb-e-hashr hai

hashr achchhā vo galī achchhī nahīñ

ahl-e-mahshar se na uljho tum 'riyāz'

hashr meñ dīvāngī achchhī nahīñ

dil-jalon se dil-lagi achchhi nahin

rone walon se hansi achchhi nahin

munh banata hai bura kyun waqt-e-waz

aaj wa'iz tu ne pi achchhi nahin

zulf-e-yar itna na rakh dil se lagao

dosti nadan ki achchhi nahin

but-kade se mai-kada achchha mera

be-KHudi achchhi KHudi achchhi nahin

muflison ki zindagi ka zikr kya

muflisi ki maut bhi achchhi nahin

is qadar khinchti hai kyun ai zulf-e-yar

le ke dil itni kaji achchhi nahin

aaen meri bazm-e-matam mein wo kya

hath mein meinhdi rachi achchhi nahin

shaiKH ko de do mai-e-be-rang-o-bu

us ki qismat se khinchi achchhi nahin

ek hasin ho dil ke bahlane ko roz

roz ki ye dil-lagi achchhi nahin

zarra zarra aaftab-e-hashr hai

hashr achchha wo gali achchhi nahin

ahl-e-mahshar se na uljho tum 'riyaz'

hashr mein diwangi achchhi nahin