dil ke dariya ki rawani mein bhi ho sakta hai

dil ke dariyā kī ravānī meñ bhī ho saktā hai

tū mirī aañkh ke paanī meñ bhī ho saktā hai

zikr terā maiñ kisī se nahīñ kartā lekin

mujh se āshufta-bayānī meñ bhī ho saktā hai

kuchh khilaunoñ pe tasarruf ke na hone kā malāl

rog bachpan kā javānī meñ bhī ho saktā hai

ghar ke chūlhe meñ jale aag ba-kasrat ki nahīñ

sho'la-e-'ishq girānī meñ bhī ho saktā hai

'ishq tū ne jo haqīqat meñ kiyā hai 'sāgar'

agle vaqtoñ kī kahānī meñ bhī ho saktā hai

dil ke dariya ki rawani mein bhi ho sakta hai

tu meri aankh ke pani mein bhi ho sakta hai

zikr tera main kisi se nahin karta lekin

mujh se aashufta-bayani mein bhi ho sakta hai

kuchh khilaunon pe tasarruf ke na hone ka malal

rog bachpan ka jawani mein bhi ho sakta hai

ghar ke chulhe mein jale aag ba-kasrat ki nahin

sho'la-e-'ishq girani mein bhi ho sakta hai

'ishq tu ne jo haqiqat mein kiya hai 'sagar'

agle waqton ki kahani mein bhi ho sakta hai