dil ke har zaKHm ko ek saz banaya jae

dil ke har zaḳhm ko ik saaz banāyā jaa.e

aur phir mahfil-e-jānāñ meñ sunāyā jaa.e

ek qatre pe hī mastāna huā hai koī

bāda-ḳhvāroñ meñ nayā jaam uThāyā jaa.e

chāk-dāmānī kī tohmat to purānī hai sanam

ab koī taaza sitam aur kamāyā jaa.e

tujh ko paane kī talab meñ jo gañvā baiThe haiñ

vo ḳhasāra bhī zamāne ko batāyā jaa.e

ham se pūchho to vafāoñ kā salīqa kyā hai

us kī har baat ko siine se lagāyā jaa.e

jitnī ūñchī ho anā utnā hī lāzim hai miyāñ

us ko ab ḳhaak ke zarroñ pe girāyā jaa.e

tujh ko taufīq milī hai jo suḳhan kī 'ādil'

is kī ḳhush-bū se har ik dil ko basāyā jaa.e

dil ke har zaKHm ko ek saz banaya jae

aur phir mahfil-e-jaanan mein sunaya jae

ek qatre pe hi mastana hua hai koi

baada-KHwaron mein naya jam uThaya jae

chaak-damani ki tohmat to purani hai sanam

ab koi taza sitam aur kamaya jae

tujh ko pane ki talab mein jo ganwa baiThe hain

wo KHasara bhi zamane ko bataya jae

hum se puchho to wafaon ka saliqa kya hai

us ki har baat ko sine se lagaya jae

jitni unchi ho ana utna hi lazim hai miyan

us ko ab KHak ke zarron pe giraya jae

tujh ko taufiq mili hai jo suKHan ki 'adil'

is ki KHush-bu se har ek dil ko basaya jae