dil kho gaya hamara kisi se mila ke hath

dil kho gayā hamārā kisī se milā ke haath

ho dastaras to kāTiye duzd-e-hinā ke haath

ik tasma rah gayā hai rag-e-jāñ kā lagā huā

jhūTā paḌā hai aah kahāñ un kā jā ke haath

hāthoñ pe ham ko naag khilāne kī mashq hai

chhūte haiñ ham jabhī tire gesū baḌhā ke haath

phailā le paañv khol ke dil ai shab-e-firāq

baiThe haiñ ham bhī ziist se apnī uThā ke haath

kyuuñ hāth-pāoñ mere ḳhushī se na bhuul jaa.eñ

uñglī chubove haath meñ jab vo milā ke haath

vo aaḌe hāthoñ luuñ ki akaḌ saarī bhuul jaa.e

muñh kī na khānā shaiḳh-jī ham se milā ke haath

sarsoñ jamānī hāthoñ pe yuuñ siikh le koī

dil se milā liyā hai dil un se milā ke haath

ye bekasī ke hāthoñ huā hai hamārā haal

paiġhām bhejte haiñ ham un ko sabā ke haath

'kaifī' na nāzukī pe tum is but kī bhūlnā

dekhe nahīñ abhī kisī nāzuk-adā ke haath

dil kho gaya hamara kisi se mila ke hath

ho dastaras to kaTiye duzd-e-hina ke hath

ek tasma rah gaya hai rag-e-jaan ka laga hua

jhuTa paDa hai aah kahan un ka ja ke hath

hathon pe hum ko nag khilane ki mashq hai

chhute hain hum jabhi tere gesu baDha ke hath

phaila le panw khol ke dil ai shab-e-firaq

baiThe hain hum bhi zist se apni uTha ke hath

kyun hath-paon mere KHushi se na bhul jaen

ungli chubowe hath mein jab wo mila ke hath

wo aaDe hathon lun ki akaD sari bhul jae

munh ki na khana shaiKH-ji hum se mila ke hath

sarson jamani hathon pe yun sikh le koi

dil se mila liya hai dil un se mila ke hath

ye bekasi ke hathon hua hai hamara haal

paigham bhejte hain hum un ko saba ke hath

'kaifi' na nazuki pe tum is but ki bhulna

dekhe nahin abhi kisi nazuk-ada ke hath