dil ki aawaz jo alfaz mein Dhaali hui hai

dil kī āvāz jo alfāz meñ Dhālī huī hai

ārzūoñ ke chaman-zār kī paalī huī hai

ham asīrān-e-mohabbat haiñ hameñ kyā ma.alūm

kis kī dastār sar-e-bazm uchhālī huī hai

har taraf dār-o-rasan ke haiñ marākiz to raheñ

sarfaroshoñ se ye duniyā kahīñ ḳhālī huī hai

us kī tah meñ haiñ nihāñ saiñkaḌoñ andāz-e-fusūñ

rasm-e-taqrīb jo mahfil se nikālī huī hai

ḳhvāb-o-ta.abīr kī raqsinda shagufta sī kalī

dāman-e-shauq meñ muddat se sañbhālī huī hai

ḳhvāh ġhairoñ se ho yā apne azīzoñ se 'kamāl'

guftugū merī huī hai to misālī huī hai

dil ki aawaz jo alfaz mein Dhaali hui hai

aarzuon ke chaman-zar ki pali hui hai

hum asiran-e-mohabbat hain hamein kya malum

kis ki dastar sar-e-bazm uchhaali hui hai

har taraf dar-o-rasan ke hain marakiz to rahen

sarfaroshon se ye duniya kahin KHali hui hai

us ki tah mein hain nihan sainkaDon andaz-e-fusun

rasm-e-taqrib jo mahfil se nikali hui hai

KHwab-o-tabir ki raqsinda shagufta si kali

daman-e-shauq mein muddat se sanbhaali hui hai

KHwah ghairon se ho ya apne azizon se 'kamal'

guftugu meri hui hai to misali hui hai