dil ki har larzish-e-muztar pe nazar rakhte hain

dil kī har larzish-e-muztar pe nazar rakhte haiñ

vo merī be-ḳhabarī kī bhī ḳhabar rakhte haiñ

dard meñ lutf-e-ḳhalish kaif-e-kashish paatā huuñ

kyā vo phir azm-e-tamāshā-e-jigar rakhte haiñ

jis taraf dekh liyā phūñk diyā tūr-e-majāz

ye tire dekhne vaale vo nazar rakhte haiñ

ḳhud taġhāful ne diyā muzhda-e-bedād mujhe

allāh allāh mire naale bhī asar rakhte haiñ

bebasī dekh ye sau baar kiyā ahd ki ab

tujh se ummīd na rakkheñge magar rakhte haiñ

hai tire dar ke sivā koī Thikānā apnā

kyā kahīñ tere ujāḌe hue ghar rakhte haiñ

koī is jabr-e-tamannā kī bhī had hai 'fānī'

ham shab-e-hijr meñ ummīd-e-sahar rakhte haiñ

dil ki har larzish-e-muztar pe nazar rakhte hain

wo meri be-KHabari ki bhi KHabar rakhte hain

dard mein lutf-e-KHalish kaif-e-kashish pata hun

kya wo phir azm-e-tamasha-e-jigar rakhte hain

jis taraf dekh liya phunk diya tur-e-majaz

ye tere dekhne wale wo nazar rakhte hain

KHud taghaful ne diya muzhda-e-bedad mujhe

allah allah mere nale bhi asar rakhte hain

bebasi dekh ye sau bar kiya ahd ki ab

tujh se ummid na rakkhenge magar rakhte hain

hai tere dar ke siwa koi Thikana apna

kya kahin tere ujaDe hue ghar rakhte hain

koi is jabr-e-tamanna ki bhi had hai 'fani'

hum shab-e-hijr mein ummid-e-sahar rakhte hain