dil mein jo kuchh hai abhi uski pazirai nahin

dil meñ jo kuchh hai abhī us kī pazīrā.ī nahīñ

maiñ ki ḳhushbū huuñ pa khulne kī ghaḌī aa.ī nahīñ

an-kahī baat ke sau ruup kahī baat kā ek

kabhī sun vo bhī jo minnat-kash-e-goyā.ī nahīñ

merī nazroñ meñ hai khilte hue phūloñ kī tarah

vo namī jo abhī shāḳhoñ meñ bhī lahrā.ī nahīñ

kyā manāzir the ki jo dekhtī āñkhoñ dekhe

ḳhvāb buntā huuñ ki āsūda-e-bīnā.ī nahīñ

sabhī daanā sabhī sar Daal ke chup baiTh rahe

ki yahāñ koī bhī shā.ista-e-rusvā.ī nahīñ

dil bujhā ho to gul-e-naġhma bhī nashtar hai 'ziyā'

shiddat-e-ġham kā ilaaj anjuman-ārā.ī nahīñ

dil mein jo kuchh hai abhi us ki pazirai nahin

main ki KHushbu hun pa khulne ki ghaDi aai nahin

an-kahi baat ke sau rup kahi baat ka ek

kabhi sun wo bhi jo minnat-kash-e-goyai nahin

meri nazron mein hai khilte hue phulon ki tarah

wo nami jo abhi shaKHon mein bhi lahrai nahin

kya manazir the ki jo dekhti aankhon dekhe

KHwab bunta hun ki aasuda-e-binai nahin

sabhi dana sabhi sar Dal ke chup baiTh rahe

ki yahan koi bhi shaista-e-ruswai nahin

dil bujha ho to gul-e-naghma bhi nashtar hai 'ziya'

shiddat-e-gham ka ilaj anjuman-arai nahin