dil mein shafqat na rahe aankh ka pani na rahe

dil meñ shafqat na rahe aañkh kā paanī na rahe

ahd meñ tere koī chiiz purānī na rahe

rasm-e-hijrat ko ba-andāz-e-digar zinda rakh

itne vīrāñ hoñ magar shauq-e-makānī na rahe

silsila band ho yāroñ kī mulāqātoñ kā

sub.h rangīñ na rahe shaam suhānī na rahe

ho sake lauh-e-dil-o-jāñ se miTā us ke nuqūsh

jaane vaale kī yahāñ koī nishānī na rahe

tū nadī naale ko har taur baham rakh paanī

vo to chāhegā ki dariyā meñ ravānī na rahe

baat jo dil meñ hai khul kar use kah de 'shāhīñ'

kyā ḳhabar kal ko ye āshufta-bayānī na rahe

dil mein shafqat na rahe aankh ka pani na rahe

ahd mein tere koi chiz purani na rahe

rasm-e-hijrat ko ba-andaz-e-digar zinda rakh

itne viran hon magar shauq-e-makani na rahe

silsila band ho yaron ki mulaqaton ka

subh rangin na rahe sham suhani na rahe

ho sake lauh-e-dil-o-jaan se miTa us ke nuqush

jaane wale ki yahan koi nishani na rahe

tu nadi nale ko har taur baham rakh pani

wo to chahega ki dariya mein rawani na rahe

baat jo dil mein hai khul kar use kah de 'shahin'

kya KHabar kal ko ye aashufta-bayani na rahe