dil o nigah mein ek raushni si lagti hai

dil o nigāh meñ ik raushnī sī lagtī hai

tumhārī yaad se vābastagī sī lagtī hai

ye kyā sitam hai mahaktī huī bahāroñ meñ

har ek chehre pe pazhmurdagī sī lagtī hai

ye kis ke haath meñ aayā hai daur-e-paimāna

laboñ pe apne baḌī tishnagī sī lagtī hai

ham apne ghar meñ bhī haiñ ab musāfiroñ kī tarah

har ek chiiz yahāñ ajnabī sī lagtī hai

har ek saañs pe pahra hai nā-ḳhudāoñ kā

ye zindagī bhī koī zindagī sī lagtī hai

hazār shauq numāyāñ the jis nazar se kabhī

vahī nigāh baḌī ajnabī sī lagtī hai

'hayāt' kaun sī ab raah iḳhtiyār kareñ

har ek raah baḌī ajnabī sī lagtī hai

dil o nigah mein ek raushni si lagti hai

tumhaari yaad se wabastagi si lagti hai

ye kya sitam hai mahakti hui bahaaron mein

har ek chehre pe pazhmurdagi si lagti hai

ye kis ke hath mein aaya hai daur-e-paimana

labon pe apne baDi tishnagi si lagti hai

hum apne ghar mein bhi hain ab musafiron ki tarah

har ek chiz yahan ajnabi si lagti hai

har ek sans pe pahra hai na-KHudaon ka

ye zindagi bhi koi zindagi si lagti hai

hazar shauq numayan the jis nazar se kabhi

wahi nigah baDi ajnabi si lagti hai

'hayat' kaun si ab rah iKHtiyar karen

har ek rah baDi ajnabi si lagti hai