dil saKHt niDhaal ho gaya hai

dil saḳht niDhāl ho gayā hai

saañs aanā muhāl ho gayā hai

tū terā visāl terī furqat

sab ḳhvāb-o-ḳhayāl ho gayā hai

vo shauq ki thā matā-e-hastī

ab jī kā vabāl ho gayā hai

kyā rabt hai merā roz o shab se

har lamha savāl ho gayā hai

jo dard bhulā diyā thā tū ne

vo dard bahāl ho gayā hai

ab chāragarī se fā.eda kyā

āġhāz-e-ma.āl ho gayā hai

tayyār rakho charāg apne

sūraj ko zavāl ho gayā hai

ai dil mirī jaan kuchh to batlā

ye kyā tirā haal ho gayā hai

lahore ki ahl-e-dil kī jaañ thā

kuufe kī misāl ho gayā hai

is ālam-e-be-kasī meñ 'shohrat'

jiitā huuñ kamāl ho gayā hai

dil saKHt niDhaal ho gaya hai

sans aana muhaal ho gaya hai

tu tera visal teri furqat

sab KHwab-o-KHayal ho gaya hai

wo shauq ki tha mata-e-hasti

ab ji ka wabaal ho gaya hai

kya rabt hai mera roz o shab se

har lamha sawal ho gaya hai

jo dard bhula diya tha tu ne

wo dard bahaal ho gaya hai

ab chaaragari se faeda kya

aaghaz-e-maal ho gaya hai

tayyar rakho charag apne

suraj ko zawal ho gaya hai

ai dil meri jaan kuchh to batla

ye kya tera haal ho gaya hai

lahore ki ahl-e-dil ki jaan tha

kufe ki misal ho gaya hai

is aalam-e-be-kasi mein 'shohrat'

jita hun kamal ho gaya hai