dil talabgar-e-tamasha kyun tha

dil talabgār-e-tamāshā kyuuñ thā

ya.anī hasrat-kash-e-duniyā kyuuñ thā

din bahar-hāl guzar hī jaate

dil kā ehsān uThāyā kyuuñ thā

saḳht begāna thā lekin yā-rab

itnā mānūs vo chehrā kyuuñ thā

juz ġhazal ḳhaak thā dāman meñ mire

us ne phir pyaar se dekhā kyuuñ thā

vo agar merī rasā.ī meñ na thā

aa.ine meñ koī vaisā kyuuñ thā

aañkh ko shauq ki dekhe us ko

dil kā pachhtāvā ki dekhā kyuuñ thā

hāsil-e-bazm hai parvāne kī raakh

raat bhar sham' kā charchā kyuuñ thā

sub.h ke naam se ghabrātā huuñ

jī ko raas aayā añdherā kyuuñ thā

sohbat-e-gul-badanāñ meñ 'shohrat'

dil meñ kāñTā sā khaTaktā kyuuñ thā

dil talabgar-e-tamasha kyun tha

yani hasrat-kash-e-duniya kyun tha

din bahar-haal guzar hi jate

dil ka ehsan uThaya kyun tha

saKHt begana tha lekin ya-rab

itna manus wo chehra kyun tha

juz ghazal KHak tha daman mein mere

us ne phir pyar se dekha kyun tha

wo agar meri rasai mein na tha

aaine mein koi waisa kyun tha

aankh ko shauq ki dekhe us ko

dil ka pachhtawa ki dekha kyun tha

hasil-e-bazm hai parwane ki rakh

raat bhar sham' ka charcha kyun tha

subh ke nam se ghabraata hun

ji ko ras aaya andhera kyun tha

sohbat-e-gul-badanan mein 'shohrat'

dil mein kanTa sa khaTakta kyun tha