din bhar ghamon ki dhup mein chalna paDa mujhe

din bhar ġhamoñ kī dhuup meñ chalnā paḌā mujhe

rātoñ ko sham.a ban ke pighalnā paḌā mujhe

Thahrī hī thī nigāh ki manzar badal gayā

ruknā paḌā mujhe kabhī chalnā paḌā mujhe

har har qadam pe jānñe vāloñ kī bhiiḌ thī

har har qadam pe bhes badalnā paḌā mujhe

rañgoñ ke intiḳhāb se uktā ke ek din

rañgoñ ke dā.ere se nikalnā paḌā mujhe

duniyā kī ḳhvāhishoñ ne mirī raah rok lī

duniyā kī ḳhvāhishoñ ko kuchalnā paḌā mujhe

bārish kuchh itnī tez huī ab ke tanz kī

gir gir ke bār-bār sambhalnā paḌā mujhe

har āshnā nigāh yahāñ ajnabī lagī

majbūr ho ke ghar se nikalnā paḌā mujhe

din bhar ghamon ki dhup mein chalna paDa mujhe

raaton ko shama ban ke pighalna paDa mujhe

Thahri hi thi nigah ki manzar badal gaya

rukna paDa mujhe kabhi chalna paDa mujhe

har har qadam pe jaanne walon ki bhiD thi

har har qadam pe bhes badalna paDa mujhe

rangon ke intiKHab se ukta ke ek din

rangon ke daere se nikalna paDa mujhe

duniya ki KHwahishon ne meri rah rok li

duniya ki KHwahishon ko kuchalna paDa mujhe

barish kuchh itni tez hui ab ke tanz ki

gir gir ke bar-bar sambhalna paDa mujhe

har aashna nigah yahan ajnabi lagi

majbur ho ke ghar se nikalna paDa mujhe