din ho ki ho wo raat abhi kal ki baat hai

din ho ki ho vo raat abhī kal kī baat hai

hotī thī un se baat abhī kal kī baat hai

jhapkī idhar palak vo udhar ho ga.e havā

jo the hamāre saath abhī kal kī baat hai

the eqtidār meñ to zamāna thā apne gird

logoñ kī thī barāt abhī kal kī baat hai

phir aa ga.e bisāt pe mohre piTe hue

khaa.ī thī ham se maat abhī kal kī baat hai

vo gul thā Daal Daal to gulshan meñ juuñ sabā

ham bhī the paat paat abhī kal kī baat hai

jo shaḳhs aaj sañg-e-malāmat kā hai hadaf

thī mohtaram vo zaat abhī kal kī baat hai

'ḳhusrav' the us ke halqa-bagoshoñ meñ aap bhī

hāthoñ meñ Daale haath abhī kal kī baat hai

din ho ki ho wo raat abhi kal ki baat hai

hoti thi un se baat abhi kal ki baat hai

jhapki idhar palak wo udhar ho gae hawa

jo the hamare sath abhi kal ki baat hai

the eqtidar mein to zamana tha apne gird

logon ki thi baraat abhi kal ki baat hai

phir aa gae bisat pe mohre piTe hue

khai thi hum se mat abhi kal ki baat hai

wo gul tha Dal Dal to gulshan mein jun saba

hum bhi the pat pat abhi kal ki baat hai

jo shaKHs aaj sang-e-malamat ka hai hadaf

thi mohtaram wo zat abhi kal ki baat hai

'KHusraw' the us ke halqa-bagoshon mein aap bhi

hathon mein Dale hath abhi kal ki baat hai