din ke pas kahan jo hum raaton mein mal banate hain

din ke paas kahāñ jo ham rātoñ meñ maal banāte haiñ

bad-hāloñ ko ḳhvāb hī shab bhar ko ḳhush-hāl banāte haiñ

us ko tasavvur tak laane meñ aap hī kho jaate haiñ ham

ḳhud hī phañs jaate haiñ ham aur ḳhud hī jaal banāte haiñ

adab ke bāzāroñ meñ in sheroñ kī qīmat kyā ma.alūm

ham to ḳhālī kārī-gar haiñ ham to maal banāte haiñ

maah o saal ke mālik lamhoñ se bhī rahte haiñ mahrūm

ham ko dekho lamhoñ se bhī maah o saal banāte haiñ

hijr meñ sochā thā ab dil ko pakkā kar leñge lekin

vasl ke va.ade dil ke aahan ko sayyāl banāte haiñ

din ke pas kahan jo hum raaton mein mal banate hain

bad-haalon ko KHwab hi shab bhar ko KHush-haal banate hain

us ko tasawwur tak lane mein aap hi kho jate hain hum

KHud hi phans jate hain hum aur KHud hi jal banate hain

adab ke bazaron mein in sheron ki qimat kya malum

hum to KHali kari-gar hain hum to mal banate hain

mah o sal ke malik lamhon se bhi rahte hain mahrum

hum ko dekho lamhon se bhi mah o sal banate hain

hijr mein socha tha ab dil ko pakka kar lenge lekin

wasl ke wade dil ke aahan ko sayyal banate hain