دن کے سنہرے خواب سے نکلا نہیں

دن کے سنہرے خواب سے نکلا نہیں

مفلس کبھی گرداب سے نکلا نہیں

آہ و فغاں کا شور پھر اس کے سوا

کچھ بھی دل بیتاب سے نکلا نہیں

واقف کہاں وہ درد کی پوشاک سے

جو اطلس و کمخواب سے نکلا نہیں

میری صدا پر غیر تو پہنچے مگر

اک پل مرے احباب سے نکلا نہیں

گرچہ نہیں ہے تذکرہ تیرا مگر

تو زندگی کے باب سے نکلا نہیں

وہ لفظ کے اسرار کو جانے گا کب

شاعر ابھی اعراب سے نکلا نہیں

پلتا ہے یہ دریا کے سینے میں ولیدؔ

موتی کبھی تالاب سے نکلا نہیں