din mein charagh-e-sham jalaya tha un dinon

din meñ charāġh-e-shām jalāyā thā un dinoñ

ik shaḳhs mere shahr meñ aayā thā un dinoñ

merā bhī haal un dinoñ kuchh thā ajiib sā

us kā bhī dil kisī ne dukhāyā thā un dinoñ

sikke kisī kī yaad ke āñchal meñ bhar liye

chhan-chhan unheñ bhī ḳhuub hilāyā thā un dinoñ

kab tak rahegī bebasī arbāb-e-iḳhtiyār

ham ne bhī ye savāl uThāyā thā un dinoñ

āsāñ nahīñ ye rāste dushvār haiñ bahut

ai ishq tujh ko ham ne batāyā thā un dinoñ

apnī ġhazal se ik taraf chup-chāp rakh liyā

vo sher bas use hī sunāyā thā un dinoñ

kuchh log pūchhte rahe ye chup sī kyuuñ lagī

mujh par tumhārī yaad kā saayā thā un dinoñ

din mein charagh-e-sham jalaya tha un dinon

ek shaKHs mere shahr mein aaya tha un dinon

mera bhi haal un dinon kuchh tha ajib sa

us ka bhi dil kisi ne dukhaya tha un dinon

sikke kisi ki yaad ke aanchal mein bhar liye

chhan-chhan unhen bhi KHub hilaya tha un dinon

kab tak rahegi bebasi arbab-e-iKHtiyar

hum ne bhi ye sawal uThaya tha un dinon

aasan nahin ye raste dushwar hain bahut

ai ishq tujh ko hum ne bataya tha un dinon

apni ghazal se ek taraf chup-chap rakh liya

wo sher bas use hi sunaya tha un dinon

kuchh log puchhte rahe ye chup si kyun lagi

mujh par tumhaari yaad ka saya tha un dinon