din teri yaad mein Dhal jata hai aansu ki tarah

din tirī yaad meñ Dhal jaatā hai aañsū kī tarah

raat taḌpātī hai ik nashtar-e-pahlū kī tarah

jaane kis soch meñ Duubā huā tanhā tanhā

dil kā aalam hai kisī sarv-e-lab-e-jū kī tarah

haa.e vahshat koī manzil ho Thahartā hī nahīñ

vaqt hai daam se chhūTe hue aahū kī tarah

rah ga.ī ghuT ke mire dil meñ tamannā terī

ek parvāz-e-shikasta par-o-bāzū kī tarah

majlis-e-shaiḳh meñ kal zikr thā jis kā ai dost

hogī jannat bhī koī shai tire pahlū kī tarah

'zeb' ab zad meñ jo aa jaa.e vo dil ho ki nigāh

us kī raftār hai chalte hue jaadū kī tarah

din teri yaad mein Dhal jata hai aansu ki tarah

raat taDpati hai ek nashtar-e-pahlu ki tarah

jaane kis soch mein Duba hua tanha tanha

dil ka aalam hai kisi sarw-e-lab-e-ju ki tarah

hae wahshat koi manzil ho Thaharta hi nahin

waqt hai dam se chhuTe hue aahu ki tarah

rah gai ghuT ke mere dil mein tamanna teri

ek parwaz-e-shikasta par-o-bazu ki tarah

majlis-e-shaiKH mein kal zikr tha jis ka ai dost

hogi jannat bhi koi shai tere pahlu ki tarah

'zeb' ab zad mein jo aa jae wo dil ho ki nigah

us ki raftar hai chalte hue jadu ki tarah