دنیا کو ہے یقیں مرا وقت زوال ہے

دنیا کو ہے یقیں مرا وقت زوال ہے

روز ازل کے نور ترا کیا خیال ہے

کیا میں اسیر ظلم و ستم روز و شب نہیں

اے رب ذو الجلال ترا کیا خیال ہے

ساحل پہ لا کے جس نے سفینے جلا دئے

اس ناخدا کے پختہ یقیں کا کمال ہے

تجھ سے مرے چراغ کی لو بجھ نہ پائے گی

پاگل ہوا کے زور تری کیا مجال ہے

موسم کی سختیوں سے بچاتی رہی مجھے

اے ماں ترا خلوص سمجھنا محال ہے

ملتے نہیں ہیں کیوں ترے بھیجے ہوئے خطوط

ہوتا نہیں یقیں مرے قاصد کی چال ہے

جاویدؔ بزم شعر و سخن میں سنائیے

وہ اک غزل جو آپ کے فن کا کمال ہے