duniyā meñ qasr-o-aivāñ be-fā.eda banāyā
uqbā inheñ banā.ī mun.im to kyā banāyā
jo unsurī gharauñdā pe chaukhaTā banāyā
ik dam meñ vo bashar kā bigḌā banā banāyā
zulfoñ meñ tā.ir-e-jāñ jis ne phañsā banāyā
tan ko qafas ragoñ ko ik jaal sā banāyā
soz-e-ġham-o-alam se bah jā.ūñ shamma-sāñ jo
ai sho.ala-rū mujhe bhī kyā mom kā banāyā
naqshe pe khiñch sakā jab maanī se dil-jaloñ kā
jis jā makān-e-dil thā ātish-kada banāyā
bahr-e-jahāñ meñ jis dam pahuñchī numūd-e-insāñ
paanī ne sar uThā ke ik bulbulā banāyā
pahnā kafan utārā hastī ke pairahan ko
pheñkā libās-e-kohna jaama nayā banāyā
ḳhāliq ne jab kahā ḳhalq abrū ke bismiloñ kā
gardan mirī banā.ī ḳhanjar tirā banāyā
chal kar sabā kī sūrat ḳhandāñ kiyā guloñ ko
ġhunchoñ kā muñh bigāḌā jab muñh zarā banāyā
shīshagarī pe nāzāñ be-kār shīsha-gar haiñ
koī bhī dil kisī kā TuuTā huā banāyā
aahoñ ke kūdkoñ ne chhalnī kiyā yahāñ tak
saqf-e-falak ko chhattā zambūr kā banāyā
shān-e-ḳhudā ayaañ hai har but se mai-kade meñ
ka.abe meñ tum ne jā kar ai 'shād' kyā banāyā
duniya mein qasr-o-aiwan be-faeda banaya
uqba inhen banai munim to kya banaya
jo unsuri gharaunda pe chaukhaTa banaya
ek dam mein wo bashar ka bigDa bana banaya
zulfon mein tair-e-jaan jis ne phansa banaya
tan ko qafas ragon ko ek jal sa banaya
soz-e-gham-o-alam se bah jaun shamma-san jo
ai shoala-ru mujhe bhi kya mom ka banaya
naqshe pe khinch saka jab mani se dil-jalon ka
jis ja makan-e-dil tha aatish-kada banaya
bahr-e-jahan mein jis dam pahunchi numud-e-insan
pani ne sar uTha ke ek bulbula banaya
pahna kafan utara hasti ke pairahan ko
phenka libas-e-kohna jama naya banaya
KHaliq ne jab kaha KHalq abru ke bismilon ka
gardan meri banai KHanjar tera banaya
chal kar saba ki surat KHandan kiya gulon ko
ghunchon ka munh bigaDa jab munh zara banaya
shishagari pe nazan be-kar shisha-gar hain
koi bhi dil kisi ka TuTa hua banaya
aahon ke kudkon ne chhalni kiya yahan tak
saqf-e-falak ko chhatta zambur ka banaya
shan-e-KHuda ayan hai har but se mai-kade mein
kabe mein tum ne ja kar ai 'shad' kya banaya
Source:
Sukhan-e-Bemisal: Deewan-e-Shad (pdf) and website (Pg. p-3 e-9 pdf-10)
-
Author:
Shad Lakhnavi
-
- Edition: 1901
- Publisher: Matbaa Tasweer-e- Alam, Lucknow
- Year of Publication: 1901
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.