duniya sanwar gai hai nizam-e-digar ke baad

duniyā sañvar ga.ī hai nizām-e-digar ke ba.ad

manzil pe aa ga.ī hai mashiyyat safar ke ba.ad

jaise dil-o-nazar ke hijābāt uTh ga.e

aalam ḳhabar kā hai nigah-e-be-ḳhabar ke ba.ad

laale meñ rañg hai ye kahāñ ye lahū tarañg

duniyā hasīn hai mire zauq-e-nazar ke ba.ad

biitī huī hayāt mohabbat kā tazkira

shām-o-sahar kī yaad hai shām-o-sahar ke ba.ad

maiñ aa gayā sukūt-o-tabassum ke darmiyāñ

vo muskurā diye suḳhan-e-muḳhtasar ke ba.ad

har rāste ko luuT liyā e'timād ne

rahzan bhī ek shai hai magar rāhbar ke ba.ad

tārīkī-e-hayāt meñ raḳhshāñ hai husn-e-dost

jalve kahāñ raheñge hujūm-e-nazar ke ba.ad

hāsil hai kā.enāt kā dard-e-dil-e-hayāt

duniyā meñ kyā rahā mirī āh-e-sahar ke ba.ad

manzil pe chhiḌ ga.ī hai kudūrat kī dāstāñ

har kārvāñ ne gard uḌaa.ī safar ke ba.ad

naqsh-e-qadam kī aañkh khulī terī raah meñ

raste bhī so ga.e haiñ tirī rahguzar ke ba.ad

ahl-e-hunar ko dekh rahā huuñ ġhamīñ 'nushūr'

duniyā hunar hai raas bhī aa.e hunar ke ba.ad

duniya sanwar gai hai nizam-e-digar ke baad

manzil pe aa gai hai mashiyyat safar ke baad

jaise dil-o-nazar ke hijabaat uTh gae

aalam KHabar ka hai nigah-e-be-KHabar ke baad

lale mein rang hai ye kahan ye lahu tarang

duniya hasin hai mere zauq-e-nazar ke baad

biti hui hayat mohabbat ka tazkira

sham-o-sahar ki yaad hai sham-o-sahar ke baad

main aa gaya sukut-o-tabassum ke darmiyan

wo muskura diye suKHan-e-muKHtasar ke baad

har raste ko luT liya e'timad ne

rahzan bhi ek shai hai magar rahbar ke baad

tariki-e-hayat mein raKHshan hai husn-e-dost

jalwe kahan rahenge hujum-e-nazar ke baad

hasil hai kaenat ka dard-e-dil-e-hayat

duniya mein kya raha meri aah-e-sahar ke baad

manzil pe chhiD gai hai kudurat ki dastan

har karwan ne gard uDai safar ke baad

naqsh-e-qadam ki aankh khuli teri rah mein

raste bhi so gae hain teri rahguzar ke baad

ahl-e-hunar ko dekh raha hun ghamin 'nushur'

duniya hunar hai ras bhi aae hunar ke baad