dusra kinara bhi be-wafa kinara hai

dūsrā kinārā bhī be-vafā kinārā hai

ab to Duub jaanā hī āḳhirī sahārā hai

maiñ utar nahīñ saktā dūsre kināre par

dūsrā kinārā to dūsrā kinārā hai

mujh pe ab mohabbat meñ zahr piinā vājib hai

maiñ ne dil nahīñ haarā hausla bhī haarā hai

ās.māñ kī vus.at meñ jaane ab kahāñ hogā

vo jo merī qismat kā be-ḳhabar sitārā hai

vaqt kī adālat kā faisla yahī hai ab

maiñ bhī ik ḳhasārā huuñ tū bhī ik ḳhasārā hai

dūsre kināre par ye ḳhabar huī mujh ko

vo to is kahānī meñ tīsrā kinārā hai

maiñ ne tere hisse ke ratjage bhī kaaTe haiñ

maiñ ne tere hisse kā qarz bhī utārā hai

dusra kinara bhi be-wafa kinara hai

ab to Dub jaana hi aaKHiri sahaara hai

main utar nahin sakta dusre kinare par

dusra kinara to dusra kinara hai

mujh pe ab mohabbat mein zahr pina wajib hai

main ne dil nahin haara hausla bhi haara hai

aasman ki wusat mein jaane ab kahan hoga

wo jo meri qismat ka be-KHabar sitara hai

waqt ki adalat ka faisla yahi hai ab

main bhi ek KHasara hun tu bhi ek KHasara hai

dusre kinare par ye KHabar hui mujh ko

wo to is kahani mein tisra kinara hai

main ne tere hisse ke ratjage bhi kaTe hain

main ne tere hisse ka qarz bhi utara hai