ek aalam ne jubba-sā.ī kī
ai buto tum ne bhī ḳhudā.ī kī
āshiqoñ ke lahū kī pyāsī haiñ
machhliyāñ us kaf-e-hinā.ī kī
zulf-e-pur-pech se jo dil uljhā
biich meñ raḳh paḌā safā.ī kī
murġh-e-be-bāl-o-par huuñ ai sayyād
aarzū hai kisī rihā.ī kī
ai junūñ dasht ko chaleñge ham
hai qasam is barahna-pā.ī kī
sar judā ham ne apnā kar Daalā
aa.ī jab guftugū judā.ī kī
phir gayā yaar ghar ke paas aa kar
baḳht-e-bargashta ne burā.ī kī
saikḌoñ jaame tujh pe phaTte haiñ
dhuum hai terī mīrzā.ī kī
tujh se to ham ko ai ḳham-e-abru
thī na ummīd kaj-adā.ī kī
koī qātil kī raah bhūlā thā
ai ajal tū ne rahnumā.ī kī
dil kahīñ aur ham ne aTkāyā
be-vafāoñ se bevafā.ī kī
na ga.ī zāhidoñ ke paas kabhī
duḳhtar-e-raz ne pārsā.ī kī
shahr meñ jā.egī mirī pā-posh
qadr vaañ kyā barahna-pā.ī kī
saaf hai aa.ina tan-e-pur-nūr
hai dalīl us pe ḳhud-numā.ī kī
kāsa-e-māh kyuuñ na ho pur-nūr
barsoñ us kūche kī gadā.ī kī
ka.aba-e-dil meñ bhī maqām kiyā
ai buto tum ne kyā rasā.ī kī
ḳhat ke aane pe bhī mukaddar hai
sūrat ab kaun sī safā.ī kī
bāl-o-par bhī ga.e bahār ke saath
ab to sūrat nahīñ rihā.ī kī
kis ke kūche kī raah bhūlā huuñ
ḳhizr ne bhī na rahnumā.ī kī
shaah kahlā.e har tarah se 'vazīr'
bādshāhī na kī gadā.ī kī
ek aalam ne jubba-sai ki
ai buto tum ne bhi KHudai ki
aashiqon ke lahu ki pyasi hain
machhliyan us kaf-e-hinai ki
zulf-e-pur-pech se jo dil uljha
bich mein raKH paDa safai ki
murgh-e-be-baal-o-par hun ai sayyaad
aarzu hai kisi rihai ki
ai junun dasht ko chalenge hum
hai qasam is barahna-pai ki
sar juda hum ne apna kar Dala
aai jab guftugu judai ki
phir gaya yar ghar ke pas aa kar
baKHt-e-bargashta ne burai ki
saikDon jame tujh pe phaTte hain
dhum hai teri mirzai ki
tujh se to hum ko ai KHam-e-abru
thi na ummid kaj-adai ki
koi qatil ki rah bhula tha
ai ajal tu ne rahnumai ki
dil kahin aur hum ne aTkaya
be-wafaon se bewafai ki
na gai zahidon ke pas kabhi
duKHtar-e-raz ne parsai ki
shahr mein jaegi meri pa-posh
qadr wan kya barahna-pai ki
saf hai aaina tan-e-pur-nur
hai dalil us pe KHud-numai ki
kasa-e-mah kyun na ho pur-nur
barson us kuche ki gadai ki
kaba-e-dil mein bhi maqam kiya
ai buto tum ne kya rasai ki
KHat ke aane pe bhi mukaddar hai
surat ab kaun si safai ki
baal-o-par bhi gae bahaar ke sath
ab to surat nahin rihai ki
kis ke kuche ki rah bhula hun
KHizr ne bhi na rahnumai ki
shah kahlae har tarah se 'wazir'
baadshahi na ki gadai ki
Source:
Daftar-e-Fasahat (Pg. ebook-215 page-199)
-
Author:
Khwaja Mohammad Wazir
-
- Edition: 1847
- Publisher: Matba Mustafai, Lucknow
- Year of Publication: 1847
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.