ek qatra na kahin KHun ka baha mere baad

ek qatra na kahīñ ḳhuuñ kā bahā mere baa'd

zañg-ālūd huī teġh-e-jafā mere baa'd

kyuuñ har ik moḌ pe hotā hai ghuTan kā ehsās

tañg kyuuñ hone lagī merī fazā mere baa'd

dekhte dekhte hī maañd paḌe shams-o-qamar

ḳhud se bezār hue sub.h-o-masā mere baa'd

har taraf zardī-e-ruḳhsār nazar aatī hai

kahīñ raushan na milā rañg-e-hinā mere baa'd

ruk gayā qāfila-e-umr-e-subuk-rau shāyad

dekh ḳhāmosh hai āvāz-e-darā mere baa'd

zindagī bhar na kiyā yaad kisī ne aur ab

pūchhte haiñ vo mere ghar kā patā mere baa'd

'umr bhar us ko sambhāle hue rakkhā maiñ ne

gir na jaa.e kahīñ dīvār-e-anā mere baa'd

ab bhī kyā is meñ hai ābād siyāhī 'hamdam'

mere vīrāne kā kyā haal huā mere baa'd

ek qatra na kahin KHun ka baha mere ba'd

zang-alud hui tegh-e-jafa mere ba'd

kyun har ek moD pe hota hai ghuTan ka ehsas

tang kyun hone lagi meri faza mere ba'd

dekhte dekhte hi mand paDe shams-o-qamar

KHud se bezar hue subh-o-masa mere ba'd

har taraf zardi-e-ruKHsar nazar aati hai

kahin raushan na mila rang-e-hina mere ba'd

ruk gaya qafila-e-umr-e-subuk-rau shayad

dekh KHamosh hai aawaz-e-dara mere ba'd

zindagi bhar na kiya yaad kisi ne aur ab

puchhte hain wo mere ghar ka pata mere ba'd

'umr bhar us ko sambhaale hue rakkha main ne

gir na jae kahin diwar-e-ana mere ba'd

ab bhi kya is mein hai aabaad siyahi 'hamdam'

mere virane ka kya haal hua mere ba'd