fankar hai to hath pe suraj saja ke la

fankār hai to haath pe sūraj sajā ke lā

bujhtā huā diyā na muqābil havā ke lā

dariyā kā intiqām Dubo de na ghar tirā

sāhil se roz roz na kankar uThā ke lā

ab iḳhtitām ko hai saḳhī harf-e-iltimās

kuchh hai to ab vo sāmne dast-e-duā ke lā

paimāñ vafā ke bāñdh magar soch soch kar

is ibtidā meñ yuuñ na suḳhan intihā ke lā

ārā.ish-e-jarāhat-e-yārāñ kī bazm hai

jo zaḳhm dil meñ haiñ sabhī tan par sajā ke lā

thoḌī sī aur mauj meñ aa ai havā-e-gul

thoḌī sī us ke jism kī ḳhushbū churā ke lā

gar sochnā haiñ ahl-e-mashiyyat ke hausle

maidāñ se ghar meñ ek tū mayyat uThā ke lā

'mohsin' ab us kā naam hai sab kī zabān par

kis ne kahā ki us ko ġhazal meñ sajā ke lā

fankar hai to hath pe suraj saja ke la

bujhta hua diya na muqabil hawa ke la

dariya ka intiqam Dubo de na ghar tera

sahil se roz roz na kankar uTha ke la

ab iKHtitam ko hai saKHi harf-e-iltimas

kuchh hai to ab wo samne dast-e-dua ke la

paiman wafa ke bandh magar soch soch kar

is ibtida mein yun na suKHan intiha ke la

aaraish-e-jarahat-e-yaran ki bazm hai

jo zaKHm dil mein hain sabhi tan par saja ke la

thoDi si aur mauj mein aa ai hawa-e-gul

thoDi si us ke jism ki KHushbu chura ke la

gar sochna hain ahl-e-mashiyyat ke hausle

maidan se ghar mein ek tu mayyat uTha ke la

'mohsin' ab us ka nam hai sab ki zaban par

kis ne kaha ki us ko ghazal mein saja ke la