faqih-e-shahr se rishta banae rahta hun

faqīh-e-shahr se rishta banā.e rahtā huuñ

sharīf ghar kā huuñ izzat bachā.e rahtā huuñ

magar ye raah to is tarah tai nahīñ hogī

maiñ donoñ paañv zamīñ par jamā.e rahtā huuñ

akele shaḳhs pe dushman diler hote haiñ

to saath meñ koī qissa lagā.e rahtā huuñ

banā.e kuchh nahīñ bantī zamīñ pe jab mujh se

to āsmān ko sar par uThā.e rahtā huuñ

abhī kahāñ koī naubat hai marne jiine kī

zarā azīzoñ ko yuuñ hī Darā.e rahtā huuñ

kisī faqīr ke tāvīz kī tarah 'zaidī'

maiñ zer-e-sañg tamannā dabā.e rahtā huuñ

faqih-e-shahr se rishta banae rahta hun

sharif ghar ka hun izzat bachae rahta hun

magar ye rah to is tarah tai nahin hogi

main donon panw zamin par jamae rahta hun

akele shaKHs pe dushman diler hote hain

to sath mein koi qissa lagae rahta hun

banae kuchh nahin banti zamin pe jab mujh se

to aasman ko sar par uThae rahta hun

abhi kahan koi naubat hai marne jine ki

zara azizon ko yun hi Darae rahta hun

kisi faqir ke tawiz ki tarah 'zaidi'

main zer-e-sang tamanna dabae rahta hun