farzanon ki is basti mein ek ajab saudai hai

farzānoñ kī is bastī meñ ek ajab saudā.ī hai

kis ke liye ye haal hai us kā kaun aisā harjā.ī hai

kis ke liye phirtā hai akelā shahr ke hañgāmoñ se duur

kaun hai jis kī ḳhātir us ko tanhā.ī raas aa.ī hai

kis ke lab o ruḳhsār kī bāteñ Dhal jaatī haiñ ġhazloñ meñ

kis ke ḳham-e-kākul kī kahānī vaj.h-e-suḳhan-ārā.ī hai

kaun hai jis kī mahrūmī ke daaġh haiñ us ke siine meñ

kaun hai jis ke ḳhvāboñ kī ik duniyā maiñ ne sajā.ī hai

kyuuñ us kī āshufta-sarī kā charchā hai ham logoñ meñ

kyuuñ itnī pur-kaif-o-soz us kī shab-e-tanhā.ī hai

'at.har' aao ham bhī us ke dil kī bāteñ sun aa.eñ

kahte haiñ dīvāna hai vo vahshī hai saudā.ī hai

farzanon ki is basti mein ek ajab saudai hai

kis ke liye ye haal hai us ka kaun aisa harjai hai

kis ke liye phirta hai akela shahr ke hangamon se dur

kaun hai jis ki KHatir us ko tanhai ras aai hai

kis ke lab o ruKHsar ki baaten Dhal jati hain ghazlon mein

kis ke KHam-e-kakul ki kahani wajh-e-suKHan-arai hai

kaun hai jis ki mahrumi ke dagh hain us ke sine mein

kaun hai jis ke KHwabon ki ek duniya main ne sajai hai

kyun us ki aashufta-sari ka charcha hai hum logon mein

kyun itni pur-kaif-o-soz us ki shab-e-tanhai hai

'athar' aao hum bhi us ke dil ki baaten sun aaen

kahte hain diwana hai wo wahshi hai saudai hai