fasl-e-gul kab luTi nahin malum

fasl-e-gul kab luTī nahīñ mā'lūm

kab bahār aa.ī thī nahīñ mā'lūm

ham bhaTakte rahe añdhere meñ

raushnī kab huī nahīñ mā'lūm

kab vo guzre qarīb se dil ke

niind kab aa ga.ī nahīñ mā'lūm

dard jab jab uThā huā mahsūs

choT kab kab lagī nahīñ mā'lūm

bebasī jis kī ziist ho us ko

ziist kī bebasī nahīñ mā'lūm

naaz sajdoñ pe hai hameñ lekin

nāzish-e-bandagī nahīñ mā'lūm

apnī hālat pe tere vahshī ko

kyuuñ hañsī aa ga.ī nahīñ mā'lūm

hosh aayā to mai-kada na rahā

haa.e kis vaqt pī nahīñ mā'lūm

merī jānib vo dekh kar bole

hai koī ajnabī nahīñ mā'lūm

daur-e-hāzir kī bazm meñ 'bekal'

kaun hai aadmī nahīñ mā'lūm

fasl-e-gul kab luTi nahin ma'lum

kab bahaar aai thi nahin ma'lum

hum bhaTakte rahe andhere mein

raushni kab hui nahin ma'lum

kab wo guzre qarib se dil ke

nind kab aa gai nahin ma'lum

dard jab jab uTha hua mahsus

choT kab kab lagi nahin ma'lum

bebasi jis ki zist ho us ko

zist ki bebasi nahin ma'lum

naz sajdon pe hai hamein lekin

nazish-e-bandagi nahin ma'lum

apni haalat pe tere wahshi ko

kyun hansi aa gai nahin ma'lum

hosh aaya to mai-kada na raha

hae kis waqt pi nahin ma'lum

meri jaanib wo dekh kar bole

hai koi ajnabi nahin ma'lum

daur-e-hazir ki bazm mein 'bekal'

kaun hai aadmi nahin ma'lum