faza-e-shab mein sitare hazar guzre hain

fazā-e-shab meñ sitāre hazār guzre haiñ

ye āsmāñ se diloñ ke ġhubār guzre haiñ

mahak uThe haiñ dar-o-bām o kūcha o bāzār

jahāñ jahāñ se tire bāda-ḳhvār guzre haiñ

mizāj pūchhte phirte haiñ zarre zarre kā

diloñ kī raah se kuchh ḳhāksār guzre haiñ

kalī ne baḌh ke pukārā guloñ ne pyaar kiyā

kabhī chaman se jo sīna-figār guzre haiñ

mujhe dikhāo na ḳhūn-e-jamāl-e-lāla-o-gul

mirī nazar se ye naqsh o nigār guzre haiñ

bahā sakā na unheñ vaqt kā bhī sail-e-ravāñ

vo chand lamhe jo is dil pe baar guzre haiñ

hamārī raah meñ 'jazbī' pahāḌ aa.e pe ham

misāl-e-abr sair-e-kohsār guzre haiñ

faza-e-shab mein sitare hazar guzre hain

ye aasman se dilon ke ghubar guzre hain

mahak uThe hain dar-o-baam o kucha o bazar

jahan jahan se tere baada-KHwar guzre hain

mizaj puchhte phirte hain zarre zarre ka

dilon ki rah se kuchh KHaksar guzre hain

kali ne baDh ke pukara gulon ne pyar kiya

kabhi chaman se jo sina-figar guzre hain

mujhe dikhao na KHun-e-jamal-e-lala-o-gul

meri nazar se ye naqsh o nigar guzre hain

baha saka na unhen waqt ka bhi sail-e-rawan

wo chand lamhe jo is dil pe bar guzre hain

hamari rah mein 'jazbi' pahaD aae pe hum

misal-e-abr sair-e-kohsar guzre hain