fida-e-dilbar-e-rangin-ada hun

fidā-e-dilbar-e-rañgīñ-adā huuñ

shahīd-e-shāhid-e-gul-gūñ-qabā huuñ

har ik mah-rū ke milne kā nahīñ zauq

suḳhan ke āshnā kā āshnā huuñ

kiyā huuñ tark nargis kā tamāshā

talab-gār-e-nigāh-e-bā-hayā huuñ

na kar shamshād kī tārīf mujh paas

ki maiñ us sarv-qad kā mubtalā huuñ

kiyā maiñ arz us ḳhurshīd-rū suuñ

tū shāh-e-husn maiñ terā gadā huuñ

sadā rakhtā huuñ shauq us ke suḳhan kā

hamesha tishna-e-āb-e-baqā huuñ

qadam par us ke rakhtā huuñ sadā sar

'valī' ham-mashrab-e-rañg-e-hinā huuñ

fida-e-dilbar-e-rangin-ada hun

shahid-e-shahid-e-gul-gun-qaba hun

har ek mah-ru ke milne ka nahin zauq

suKHan ke aashna ka aashna hun

kiya hun tark nargis ka tamasha

talab-gar-e-nigah-e-ba-haya hun

na kar shamshad ki tarif mujh pas

ki main us sarw-qad ka mubtala hun

kiya main arz us KHurshid-ru sun

tu shah-e-husn main tera gada hun

sada rakhta hun shauq us ke suKHan ka

hamesha tishna-e-ab-e-baqa hun

qadam par us ke rakhta hun sada sar

'wali' ham-mashrab-e-rang-e-hina hun