fikr-e-uqba hai mujhe KHwahish-e-duniya hai mujhe

fikr-e-uqbā hai mujhe ḳhvāhish-e-duniyā hai mujhe

aish kī dhun hai mujhe maut kā dhaḌkā hai mujhe

maut kahte haiñ jise zabt kī takmīl na ho

ki tanaffus pe bhī fariyād kā dhokā hai mujhe

husn vo chāhiye jo ishq kā ā.īna bane

ya.anī apne liye apnī hī tamannā hai mujhe

tum na ghabrāo mujhe tum se koī kaam nahīñ

apnī ḳhvāhish hai mujhe apnī tamannā hai mujhe

ye to ma.alūm nahīñ un kā irāda kyā hai

haañ nigāh-e-ġhalat-andāz se dekhā hai mujhe

hijr kī shab udhar allāh idhar vo but hai

dekhnā ye hai ki ab kaun bulātā hai mujhe

ek but ek hī but kā huuñ pujārī 'aḳhtar'

apne is shirk pe tauhīd kā da.avā hai mujhe

fikr-e-uqba hai mujhe KHwahish-e-duniya hai mujhe

aish ki dhun hai mujhe maut ka dhaDka hai mujhe

maut kahte hain jise zabt ki takmil na ho

ki tanaffus pe bhi fariyaad ka dhoka hai mujhe

husn wo chahiye jo ishq ka aaina bane

yani apne liye apni hi tamanna hai mujhe

tum na ghabrao mujhe tum se koi kaam nahin

apni KHwahish hai mujhe apni tamanna hai mujhe

ye to malum nahin un ka irada kya hai

han nigah-e-ghalat-andaz se dekha hai mujhe

hijr ki shab udhar allah idhar wo but hai

dekhna ye hai ki ab kaun bulata hai mujhe

ek but ek hi but ka hun pujari 'aKHtar'

apne is shirk pe tauhid ka dawa hai mujhe