fikr rakhte hain kahan zehn agar rakhte hain

fikr rakhte haiñ kahāñ zehn agar rakhte haiñ

dasht-e-be-āb meñ jo tuḳhm-e-hunar rakhte haiñ

har na.ī baat bhulā detī hai pahle kā ḳhayāl

vo to aḳhbār haiñ bas taaza ḳhabar rakhte haiñ

miT gayā rang-e-ta.alluq to ye chehre ke nuqūsh

ek ik ḳhatt-e-ta.assur meñ ḳhabar rakhte haiñ

aise logoñ kā milā ham ko zamāna jo log

kor-bīnā haiñ magar ham pe nazar rakhte haiñ

koī aahaT hai na dastak ki bichhaḌ jaa.e sukūt

jin ko dīvār mayassar ho vo dar rakhte haiñ

jab bhī aatī hai kisī samt se maqtal kī havā

dhyān aatā hai abhī dosh pe sar rakhte haiñ

fikr rakhte hain kahan zehn agar rakhte hain

dasht-e-be-ab mein jo tuKHm-e-hunar rakhte hain

har nai baat bhula deti hai pahle ka KHayal

wo to aKHbar hain bas taza KHabar rakhte hain

miT gaya rang-e-talluq to ye chehre ke nuqush

ek ek KHatt-e-tassur mein KHabar rakhte hain

aise logon ka mila hum ko zamana jo log

kor-bina hain magar hum pe nazar rakhte hain

koi aahaT hai na dastak ki bichhaD jae sukut

jin ko diwar mayassar ho wo dar rakhte hain

jab bhi aati hai kisi samt se maqtal ki hawa

dhyan aata hai abhi dosh pe sar rakhte hain