fuzul naz uThane se baat bigDi hai

fuzūl naaz uThāne se baat bigḌī hai

kisī ko dil meñ basāne se baat bigḌī hai

thā vājibī sā ta'alluq to baat achchhī thī

ta'alluqāt baḌhāne se baat bigḌī hai

ham iḳhtilāf ko aapas meñ tai na kar paa.e

kisī ko biich bulāne se baat bigḌī hai

mohabbatoñ meñ takalluf bhī hai sam-e-qātil

qadam sañbhal ke uThāne se baat bigḌī hai

tumhāre saath bigaḌne pe kuchh malāl nahīñ

hamārī ek zamāne se baat bigḌī hai

fazā-e-vahm dar aa.ī ta'alluqāt ke biich

ghaḌī ghaḌī ke fasāne se baat bigḌī hai

ham apnī zaat kī tardīd kar nahīñ paa.e

anā ke zo'm meñ aane se baat bigḌī hai

tire baġhair guzāra nahīñ kisī sūrat

use ye baat batāne se baat bigḌī hai

fuzul naz uThane se baat bigDi hai

kisi ko dil mein basane se baat bigDi hai

tha wajibi sa ta'alluq to baat achchhi thi

ta'alluqat baDhane se baat bigDi hai

hum iKHtilaf ko aapas mein tai na kar pae

kisi ko bich bulane se baat bigDi hai

mohabbaton mein takalluf bhi hai sam-e-qatil

qadam sanbhal ke uThane se baat bigDi hai

tumhaare sath bigaDne pe kuchh malal nahin

hamari ek zamane se baat bigDi hai

faza-e-wahm dar aai ta'alluqat ke bich

ghaDi ghaDi ke fasane se baat bigDi hai

hum apni zat ki tardid kar nahin pae

ana ke zo'm mein aane se baat bigDi hai

tere baghair guzara nahin kisi surat

use ye baat batane se baat bigDi hai