ghaflaton ka samar uThata hun

ġhaflatoñ kā samar uThātā huuñ

roz taaza ḳhabar uThātā huuñ

baat baḌhtī hai tuul dene se

so ise muḳhtasar uThātā huuñ

ho ke bāshinda ik sitāre kā

uñgliyāñ chāñd par uThātā huuñ

chūmte haiñ jise uThā kar log

maiñ use chuum kar uThātā huuñ

ab kahāñ āsmān chhūne ko

zahmat-e-bāl-o-par uThātā huuñ

sū-e-manzil meñ har qadam apnā

ik falak chhoḌ kar uThātā huuñ

vaar kartī hai jab palaT kar mauj

ehtiyātan bhañvar uThātā huuñ

apnī maftūha sar-zamīnoñ par

paañv rakhtā huuñ sar uThātā huuñ

ghaflaton ka samar uThata hun

roz taza KHabar uThata hun

baat baDhti hai tul dene se

so ise muKHtasar uThata hun

ho ke bashinda ek sitare ka

ungliyan chand par uThata hun

chumte hain jise uTha kar log

main use chum kar uThata hun

ab kahan aasman chhune ko

zahmat-e-baal-o-par uThata hun

su-e-manzil mein har qadam apna

ek falak chhoD kar uThata hun

war karti hai jab palaT kar mauj

ehtiyatan bhanwar uThata hun

apni maftuha sar-zaminon par

panw rakhta hun sar uThata hun