ghairat-e-ishq ka ye ek sahaara na gaya

ġhairat-e-ishq kā ye ek sahārā na gayā

laakh majbūr hue un ko pukārā na gayā

kyā lahū ro.e to aayā hai bahāroñ kā salām

sirf ḳhvāboñ se haqā.eq ko sañvārā na gayā

ma.arka ishq kā sar de ke bhī sar ho na sakā

kaun raahī thā jo is raah meñ maarā na gayā

vo bhī vaqt aatā hai saaqī bhī badal jaate haiñ

mai-kade par kabhī mastoñ kā ijārā na gayā

shauq kī baat kab alfāz meñ Dhal saktī thī

us parī ko kabhī shīshe meñ utārā na gayā

kabhī Takrā diye shīshe kabhī chhalkā diye jaam

rā.egāñ ek bhī saaqī kā ishārā na gayā

aa.ine jitne bhī dekhe vo mukaddar the 'surūr'

jauhar-e-sidq-o-safā phir bhī hamārā na gayā

ghairat-e-ishq ka ye ek sahaara na gaya

lakh majbur hue un ko pukara na gaya

kya lahu roe to aaya hai bahaaron ka salam

sirf KHwabon se haqaeq ko sanwara na gaya

marka ishq ka sar de ke bhi sar ho na saka

kaun rahi tha jo is rah mein mara na gaya

wo bhi waqt aata hai saqi bhi badal jate hain

mai-kade par kabhi maston ka ijara na gaya

shauq ki baat kab alfaz mein Dhal sakti thi

us pari ko kabhi shishe mein utara na gaya

kabhi Takra diye shishe kabhi chhalka diye jam

raegan ek bhi saqi ka ishaara na gaya

aaine jitne bhi dekhe wo mukaddar the 'surur'

jauhar-e-sidq-o-safa phir bhi hamara na gaya