ġhalat hai dil pe qabza kyā karegī be-ḳhudī merī
ye jins-e-mushtarak hai jo kabhī un kī kabhī merī
hijāb uThte chale jaate haiñ aur maiñ baḌhtā jaatā huuñ
kahāñ tak mujh ko le jaatī hai dekhūñ be-ḳhudī merī
tavahhum thā mujhe naqsh-e-duī kis tarah miTtā hai
naqāb-e-ruḳh ulaT kar is ne sūrat khīñch dī merī
idhar bhī uḌ ke aa ḳhākistar-e-dil muntazir maiñ huuñ
lagā luuñ tujh ko āñkhoñ se tū hī hai zindagī merī
'azīz' ik din mujhe ye rāzdārī ḳhatm kar degī
kisī ne baat idhar kī aur rañgat uḌ ga.ī merī
ghalat hai dil pe qabza kya karegi be-KHudi meri
ye jins-e-mushtarak hai jo kabhi un ki kabhi meri
hijab uThte chale jate hain aur main baDhta jata hun
kahan tak mujh ko le jati hai dekhun be-KHudi meri
tawahhum tha mujhe naqsh-e-dui kis tarah miTta hai
naqab-e-ruKH ulaT kar is ne surat khinch di meri
idhar bhi uD ke aa KHakistar-e-dil muntazir main hun
laga lun tujh ko aankhon se tu hi hai zindagi meri
'aziz' ek din mujhe ye raazdari KHatm kar degi
kisi ne baat idhar ki aur rangat uD gai meri
Source:
Anjum Kada (Pg. 86)
-
Author:
Mirza Mohammad Hadi Aziz Lakhnavi
-
- Edition: 1956
- Publisher: Anjuman Taraqqi Urdu (Hind), Aligarh
- Year of Publication: 1956
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.