gham-e-KHamosh jo ba-ashk-chakan rakhta hun

ġham-e-ḳhāmosh jo bā-ashk-chakāñ rakhtā huuñ

ek Thahre hue dariyā ko ravāñ rakhtā huuñ

ik badaltī huī duniyā kā samāñ rakhtā huuñ

un kī jānib se mohabbat kā gumāñ rakhtā huuñ

shauq-e-tāza ho ki ho hasrat-e-bālīda koī

kuchh na kuchh silsila-e-āh-o-fuġhāñ rakhtā huuñ

kuchh jhijaktī huī nazreñ haiñ ḳharīdār jamīl

maiñ bhī palkoñ pe sitāroñ kī dukāñ rakhtā huuñ

muntazir haiñ haram-o-dair ke goshe ya.anī

maiñ ne jo sham.a jalā.ī hai kahāñ rakhtā huuñ

maslahat hai ki tirā tiir na ḳhālī jaa.e

varna muTThī meñ irādoñ kī kamāñ rakhtā huuñ

ġhair ke haath meñ āzādī-e-raushan kā charāġh

maiñ faqat murda charāġhoñ kā dhuāñ rakhtā huuñ

daaġh huuñ lāla-e-aqavām-e-jahāñ ke dil kā

maiñ bahāroñ ke kaleje pe ḳhizāñ rakhtā huuñ

terī baḳhshī huī āzād jabīñ kī saugand

ek sajda bhī ġhulāmī meñ garāñ rakhtā huuñ

koī manzil ho mujhe ābla-pā.ī se hai kaam

kuchh zamīñ kahtī hai maiñ paañv jahāñ rakhtā huuñ

inqalābāt-o-azā.em ke sañvarne ke liye

ek ā.īna pas-e-lafz-o-bayāñ rakhtā huuñ

merī duniyā meñ na ka.aba hai na but-ḳhāna 'nushūr'

dil ke goshe meñ magar dair-e-muġhāñ rakhtā huuñ

gham-e-KHamosh jo ba-ashk-chakan rakhta hun

ek Thahre hue dariya ko rawan rakhta hun

ek badalti hui duniya ka saman rakhta hun

un ki jaanib se mohabbat ka guman rakhta hun

shauq-e-taza ho ki ho hasrat-e-baalida koi

kuchh na kuchh silsila-e-ah-o-fughan rakhta hun

kuchh jhijakti hui nazren hain KHaridar jamil

main bhi palkon pe sitaron ki dukan rakhta hun

muntazir hain haram-o-dair ke goshe yani

main ne jo shama jalai hai kahan rakhta hun

maslahat hai ki tera tir na KHali jae

warna muTThi mein iradon ki kaman rakhta hun

ghair ke hath mein aazadi-e-raushan ka charagh

main faqat murda charaghon ka dhuan rakhta hun

dagh hun lala-e-aqawam-e-jahan ke dil ka

main bahaaron ke kaleje pe KHizan rakhta hun

teri baKHshi hui aazad jabin ki saugand

ek sajda bhi ghulami mein garan rakhta hun

koi manzil ho mujhe aabla-pai se hai kaam

kuchh zamin kahti hai main panw jahan rakhta hun

inqalabaat-o-azaem ke sanwarne ke liye

ek aaina pas-e-lafz-o-bayan rakhta hun

meri duniya mein na kaba hai na but-KHana 'nushur'

dil ke goshe mein magar dair-e-mughan rakhta hun