gham hai wahin pa gham ka sahaara guzar gaya

ġham hai vahīñ pa ġham kā sahārā guzar gayā

dariyā Thahar gayā hai kināra guzar gayā

bas ye safar hayāt kā itnī sī zindagī

kyuuñ itnī jaldī rāsta saarā guzar gayā

vo jis kī raushnī se chamaknā thā baḳht ko

kis āsmān se vo sitāra guzar gayā

kyā zikr us ghaḌī kā kaḌī thī ki sahl thī

jo vaqt jis tarah bhī guzārā guzar gayā

tafhīm-e-dostī meñ baḌī bhuul ho ga.ī

phir duur se hī dost hamārā guzar gayā

kar ke yaqīn phir se ki maiñ mushkiloñ meñ huuñ

Thahrā nahīñ vo shaḳhs dobāra guzar gayā

ik vaqt ḳhush-nasīb sā aayā to thā 'adīm'

maddham sī ik sadā meñ pukārā guzar gayā

mujrim huā thā aañkh jhapakne kā maiñ 'adīm'

jo zehn meñ basā thā nazāra guzar gayā

gham hai wahin pa gham ka sahaara guzar gaya

dariya Thahar gaya hai kinara guzar gaya

bas ye safar hayat ka itni si zindagi

kyun itni jaldi rasta sara guzar gaya

wo jis ki raushni se chamakna tha baKHt ko

kis aasman se wo sitara guzar gaya

kya zikr us ghaDi ka kaDi thi ki sahl thi

jo waqt jis tarah bhi guzara guzar gaya

tafhim-e-dosti mein baDi bhul ho gai

phir dur se hi dost hamara guzar gaya

kar ke yaqin phir se ki main mushkilon mein hun

Thahra nahin wo shaKHs dobara guzar gaya

ek waqt KHush-nasib sa aaya to tha 'adim'

maddham si ek sada mein pukara guzar gaya

mujrim hua tha aankh jhapakne ka main 'adim'

jo zehn mein basa tha nazara guzar gaya