gham ka suraj kabhi Dhalta hi nahin

ġham kā sūraj kabhī Dhaltā hī nahīñ

āsmāñ rang badaltā hī nahīñ

de diyā jaatā hai qabza dil par

dil to siine se nikaltā hī nahīñ

kahte haiñ ūñchī uḌānoñ vaale

jo girā phir vo sañbhaltā hī nahīñ

hai ḳhushāmad hī se aamad lekin

vo ḳhushāmad se pighaltā hī nahīñ

gaañv bhar ḳhauf-zada hai us se

jo kabhī ghar se nikaltā hī nahīñ

kisī insān kā dil ho ki charāġh

be jalā.e kabhī jaltā hī nahīñ

ḳhāmushī hai to baḌī chiiz magar

kaam chup rahne se chaltā hī nahīñ

shā'irī kar ke bhī dekhā hai 'shakīl'

dil meñ kuchh hai jo nikaltā hī nahīñ

gham ka suraj kabhi Dhalta hi nahin

aasman rang badalta hi nahin

de diya jata hai qabza dil par

dil to sine se nikalta hi nahin

kahte hain unchi uDanon wale

jo gira phir wo sanbhalta hi nahin

hai KHushamad hi se aamad lekin

wo KHushamad se pighalta hi nahin

ganw bhar KHauf-zada hai us se

jo kabhi ghar se nikalta hi nahin

kisi insan ka dil ho ki charagh

be jalae kabhi jalta hi nahin

KHamushi hai to baDi chiz magar

kaam chup rahne se chalta hi nahin

sha'iri kar ke bhi dekha hai 'shakil'

dil mein kuchh hai jo nikalta hi nahin